बैतडीको सुर्नया गाउँपालिका ढोल्यामोडमा पहिलोपटक प्रहरी पोष्टको स्थापना

गोबिन्द यस् सुदुरपश्चिम टुडे।  अपराधिक घटना र वन्यजन्तुको चोरीनिकासी बढ्न थालेपछी बैतडीको सुर्नया गाउँपालिका ८ ढोल्यामोडमा अस्थाई प्रहरी पोष्ट स्थापना गरिएको छ । जिल्लाका ३ स्थानीय तहको मिलन बिन्दुका रुपमा रहेको ढोल्यामोड क्षेत्रमा अपराधिक घटना र वन्यजन्तुको चोरीनिकासी न्युनीकरण गर्न प्रहरी पोष्ट स्थापना गरिएको हो । ढोल्यामोड सुर्नया गाउँपालिकाका साथै सिगास गाउँपालिकाका र पुर्चौडी नगरपालिकाको मिलन बिन्दुका रुपमा रहेको छ ।

आइतबार प्रहरी पोष्टको एक औपचारिक कार्याक्रमकाबिच उद्घाटन गरिएको छ । प्रमुख जिल्ला अधिकारी मोहनराज जोशीको अध्यक्षतामा सम्पन्न कार्यक्रमका प्रमुख अतिथी पुर्चौडी नगरपालिकाका प्रमुख रणबहादुर कुँवर रहनुभएको थियो । यस्तै कार्यक्रममा बैतडीका प्रहरीप्रमुख प्रहरी नायव उपरिक्षक नारायणप्रसाद अधिकारी, सुर्नया गाउँपालिका अध्यक्ष वीर वहादुर विष्ट र उपाध्यक्ष लिला विष्ट, सिगास गाउँपालिकाका अध्यक्ष हरि सिंह धामी र उपाध्यक्ष द्रोपती चन्द लगायत वडाअध्यक्ष र जनप्रतिनिधिहरुको सहभागिता रहेको थियो ।
बझाङ जोड्ने जयपृथ्वी राजमार्ग अन्तर्गतको बजार क्षेत्र भएकाले अन्य अपराधिक क्रियाकलाप पनि न्युनीकरण हुने विश्वास गरिएको छ । कार्यक्रममा बोल्नुहुदैं पुर्चौडी नगरपालिकाका प्रमुख कुँवरले पोष्ट स्थापनाले शान्ति सु व्यवस्था कायम गर्न सहयोग पुग्ने बताउनुभयो ।
यस्तै प्रमुख जिल्ला अधिकारी जोशीले अपराधिक क्रियाकलाप र वन्यजन्तु चोरीसिकारी नियन्त्रण गर्नका साथै शान्ति सुरक्षाका लागि पोष्टले काम गर्ने बताउनुभयो । हाललाई घर भाडामा लिएर बस्ने पोष्टको बार्षिक भाडा तिनै स्थानीय तहले चार चार महिनाको तिर्ने जनाईएको छ । हाललाई पोष्टमा प्रहरी सहायक निरीक्षकको नेतृत्वमा ५ जनाको टोली बसेको प्रहरी प्रमुख अधिकारीले बताउनुभयो ।